ALGUNS ASPECTOS DO DESENVOLVIMENTO CAPITALISTA ACTUAL por Antxon Mendizabal e Sagra Lopez. Publicado em ALDARRIKA: Observando de perto o inimigo. Dossier FMI, BM, GATT. Seminário Erándio 1, 2, 3, Julho de 1994. Pp 3-17

4.- O Processo de Globalizaçom

• Mencionaremos em primeiro lugar o que com o nome "a nova divisom internacional do trabalho" designava o amplo processo de "deslocalizaçons produtivas" que transportava as produçons intesivas em mao-de-obra (aquelas em que o nível salaraial condiciona a composiçom do valor acrescentado) às zonas do Terceiro Mundo em que o baixo custo salarial era o seu elemento mais competitivo. Este processo, que atinge directamente aos sectores tradicionais: siderurgia, construçom naval, cobertaria, semicondutores, produtos electrónicos, têxtil, etc., neutraliza todo um período de subas salariais e conquistas sociais provocado pola pressom sindical e o movimento operário organizado nos países desenvolvidos nos anos anteriores à crise.

  Temos aliás aqui o miolo da compreensom da depressom de muitas regions industriais prósperas noutrora e com forte presença do movimento operário organizado: a regiom dos Apalaches em USA, Alsácia-Lorraine em França, La Walonie na Bélgica, Euskádi no Estado espanhol, Bacia do Ruhr na Alemanha, Norte da Inglaterra e Gales na Gram Bretanha, etc.

• Em segundo lugar, mencionaremos a ascensom dos Quatro Dragons asiáticos: Singapura, Hong-Kong, Coreia do Sul e Taiwan, parelho precisamente ao declínio das antigas regions industrializadas nos países desenvolvidos. Trata-se de pequenas economias, com umha fraca procura interna e abertas ao mercado exterior, que criárom as condiçons adequadas (forte intervençom do Estado, carência de liberdades sindicais, políticas e sociais, baixos salários, longas jornadas, fortes ritmos de trabalho, ausência de segurança social, cultura confuciana, etc.) para terem acesso privilegiado à subcontrataçom mundial e resituar os processos produtivos originários do mundo desenvolvido. Com esta base é que elaborarám posteriormente umha estratégia centrada na produçom de produtos de maior conteúdo tecnológico.

  É assim que Coreia do Sul, Taiwan, Hong-Kong e Singapura comandárom o crescimento económico mundial nos últimos 30 anos e estám entre os principais exportadores. Entre 1965 e 1990, o crescimento anual médio do PIB dos Dragons foi de 7% face a 2% de promédio dos países da OCDE. As exportaçons destes países passárom de representarem 1,7% do total mundial em 1967 a 9,2%, quer dizer, umha cifra equivalente à do Japom para umha populaçom mais reduzida (75 milhons de habitantes).

  Coreia do Sul controla 25% do mercado mundial da construçom naval e é o primeiro produtor mundial de circuítos de memória electrónicos. Taiwan, com 20 milhons de habitantes e as maiores reservas de divisas do mundo, é por sua vez o primeiro produtor mundial de calçado e proporciona 5% dos computadores pessoais que se fabricam no mundo e 40% dos teclados e placas para esses computadores (17). Cumpre vincar que o modelo exposto de industrializaçom se estende agora, sob a denominaçom de "os novos países industrializados", para países como a Maláisia, a Indonésia, a Tailándia e outros).

• Temos em terceiro lugar a ascensom da República Popular Chinesa que tem implantado o capitalismo selvagem em quatro donas especiais e 14 cidades costeiras, criou melhores condiçons do que os quatro Dragons para atrair os investimentos estrangeiros e a subcontrataçom mundial (semanas laboráveis de entre 80 e 100 horas, utilizaçom intensiva de mao-de-obra feminina, ausência de férias e segurança social, liberdade absoluta de contrataçom de despedimento, salários de 5.000 pts. mensais, etc.). Desde o começo da reforma de Deng Xiaoping em 1978, o crescimento do PIB tem-se situado numha média de 9% anual e a economia chinesa tem-se quadriplicado.

  A República Popular Chinesa, que de continuar assim pode converter-se em várias décadas na primeira potência económica mundial (a custa de gerar gigantescas diferenças sociais), está a derrotar o Japom na produçom de produtos de baixo e mediano valor acrescentado, tem implantado no seu território mais de 16.000 filiais de multinacionais estrangeiras e está a assistir à transferência ao seu território de plantas produtivas procedentes da estrutura industrial dos 4 Dragons (calçados, brinquedos, etc.) (18).

Nestas condiçons, a ausência de umha "carta social" que garanta umha cobertura social básica a todos os habitantes do planeta e de umha regulaçom mundial que proíba a produçom no incumprimento de determinadas condiçons sociais, tornam a subcontrataçom, a flexibilidade e o dumping social numha decisiva base de competitividade internacional.

Assistimos portanto a um processo em que a globalizaçom redistribui a exclusom mundial, de jeito que cada vez há mais pedaços do Terceiro Mundo no Primeiro Mundo (35 milhons de pessoas em USA, 55 milhons na CEE e a Quarta parte das famílias japonesas vivem na pobreza) e, relativamente, certos pedaços do Primeiro Mundo no Terceiro Mundo. Este processo está na base da tendência à deslocalizaçom produtiva, à flexibilidade laboral, à reduçóm das despesas sociais e dos níveis salariais, aos esquecimentos em matéria de protecçom social , ao desmantelamento do estado assistencial e à desregulaçom do mercdo de trabalho, patenteada nos países desenvolvidos.

5.- A evoluçom do Mercado de Trabalho nos países desenvolvidos.